Дүние
CNN: Путин 9 мамырда "арнайы операцияны" соғыс деп жариялауы мүмкін
Биыл Мәскеуде 9 мамырда өтетін шеруге шетелдік көшбасшылар келмейді. 9 мамырда Ресей президенті Владимир Путин Украинадағы "арнайы әскери операцияны" соғыс деп жариялауы мүмкін, деп хабарлайды CNN арнасы.
Астана, NEGE. Украинаға соғыс жариялау арқылы Владимир Путин жұмылдыру жұмыстарын бастамақ. Немесе ресми Мәскеу 9 мамырда Луганск және Донецк облыстарын аннексиялап, Одессаға қарсы жойқын шабуыл ұйымдастырып, Мариупольді толық бақылауына алғанын жариялауы мүмкін.
Ресейдің 9 мамырда жалпы жұмылдыруды жариялауға дайындалып жатқандығы туралы 2 мамырда Украина қорғаныс министрлігінің Басты барлау басқармасының басшысы Кирилл Буданов айтқан болатын.
"Иә, олар дайындалуда. Росрезерв тексеріс жүргізе бастады", – деді ол.
The Washington Post басылымы АҚШ-тың жоғары лауазымды өкіліне сілтеме жасай отырып, "Ресей мамыр айының соңында Шығыс Украинаның бір бөлігін аннексиялауды жоспарлап отыр" деген ақпарат жариялады.
Бұған дейін "9 мамырда Ресей жұмылдыру жұмыстарын бастауы мүмкін" деп Ұлыбританияның Қорғаныс министрі Бен Уоллес және АҚШ Мемлекеттік департаментінің өкілі Нед Прайс мәлімдеген болатын.