«Бізге тыныштық бермейтін болды» – Уәлихан Бишімбаев

Онда «Жекеменшік «Bishimbayev University» оқу орны абитуриенттерді жаңа оқу жылынан бастап қабылдайды. Университет заң, салық құқығы, қаржы саласы мамандарын дайындайды» делінген.

Алайда, бұл қауесетті Ғылым және жоғары білім министрлігі жоққа шығарды.

«Елімізде университет ашатын адамдар министрліктің лицензиясын алады. Яғни, заңды немесе жеке тұлғалар бұл лицензияны алмай, университет аша алмайды. Осы айтылғандарды негізге ала отырып, министрлік «Bishimbayev University» атауымен білім беру қызметін жүзеге асыруға лицензия берілгенін жоққа шығарады, сондай-ақ «е-лицензиялау» ақпараттық жүйесінде тиісті өтінімнің болмағанын хабарлайды», – деді министрліктің баспасөз хатшысы.

NEGE тілшісі бұл әңгіменің шеті қайдан шыққанын Уәлихан Бишімбаевтың өзінен сұрады.

«Мұндай нәрсе біздің ойымызда да жоқ. Сыртымыздан біреулер әдейі осындай жалған ақпарат таратып жатыр. Қазір ойына келгенді айтып, жаза береді. Біздің дұшпандарымыз көп қой. Бұрынғы келін бар, қайтыс болған келіннің туыстары бар, әр нәрсені айтып жүреді.

Бізге тыныштық бермейтін болды. «Табалдырықтан биік тау жоқ, ағайыннан асқан жау жоқ» деген осы. Алдында 1 млн долларымызды алып, қайтармай қойған, бүгінде тергеу изоляторында жатқан туысымыз Қайрат Кемеловтің әйелі Тараз қаласынан. Бәлкім, солар шығаруы мүмкін.

Әрбірден соң заң саласына қатысты оқу орын ашатындай заңгер емеспін. Бұл ақпараттың жалған екендігі туралы Ғылым және жоғары білім министрлігі де мәлімдемесін таратты», – деп жауап берді.

Сондай-ақ, бүгін Қуандық Бишімбаевтың бұрынғы әйелі Назым Қаһарман Бишімбаевтың балаларға алимент төлеуден бас тартқаны туралы айтыпты.

«Былтыр балалардың демалысына да, психологтың қызметтері үшін де ешқандай ақша төленбеді. Бір жарым жыл ішінде әжептәуір ақша жиналып қалды. Біз оған бірнеше рет жүгіндік. Мен төлеген барлық соманы оның адвокаты Е.Ғазымжановқа жібердім, бірақ олар мұны елемеді. Денсаулық туралы айтпай-ақ қояйын, дәрігерге көрінгеніміз, дәрумендер, дәрі-дәрмектерге кеткен шығын жабылмады. Наурыз айында алимент төленбеді», – деген Назым Қаһарман.

Бұл туралы Уәлихан Бишімбаев: «Алиментті заң бойынша балалардың әкесі төлейді. Ол енді түрмеде. Біз заң бойынша немерелерімнің ата-әжесіміз. Бірақ біз соған қарамастан балалардың оқуына, керек-жарағына қаржы беріп тұрмыз. Бұрын Қуандық жыл сайын шетелге демалысқа жіберіп тұрды. Қазір ондай мүмкіндігіміз жоқ. Екі зейнеткер не істей аламыз?», – деді.

Ал Қ.Бишімбаевтың адвокаты Ерлан Ғазымжанов: «Бұл шындыққа жанаспайды. Назым Қаһарман жалған ақпарат айтқан. Қыркүйекте шығындары туралы есеп жібергені есімде. Бишімбаев бостандықта емес қой. Әкесі ретінде алиментті өзі төлеуі тиіс. Ал ата-анасы немерелеріне көмек ретінде қаржы беріп тұратын шығар», – деді бізге берген пікірінде.