«Біз Қазақстан Президентінің Ресейге мемлекеттік сапарын асыға күтеміз» – Дмитрий Песков

Астана, NEGE. – Біз қараша айына Ресей Федерациясына жоспарланған ҚР Президентінің мемлекеттік сапарына дайындық жұмыстарын жүргізіп жатырмыз. Дайындық әртүрлі бағытта жүргізіліп жатыр – дипломаттар, парламенттер мен БАҚ бірлесе жұмыс істеуде, – деді Кремль өкілі.

Ол алдағы шараның маңыздылығы мен ауқымдылығына тоқталып, оның барлық тараптар үшін үлкен жауапкершілік екенін айтты.

– Жауапкершілік өте үлкен және біз сапарды асыға күтеміз. Жоғары деңгейлі байланыстар барысында пысықталатын құжаттардың қомақты пакеті дайындалып жатыр, – деп қосты Дмитрий Песков.

Оның айтуынша, қабылдаушы мемлекет сапардың жоғары деңгейде өтуі үшін қолдан келгеннің бәрін жасайды.

– Біз сапардың сәтті болатынына сенімдіміз. Қабылдаушы ел ретінде біз барлығын барынша жоғары деңгейде жасауға дайындалып жатырмыз, – деді ол.

Медиафорум барысында Дмитрий Песков сондай-ақ Ресей мен Қазақстан екі тәуелсіз мемлекет болғанымен, тарихи мұрасы ортақ екенін және бірлесе даму әлеуетіне ие екенін айтты.

Айта кетейік, 28 қыркүйек күні Алматыда ІІ Қазақстан-Ресей медиафорумы өтті.