БҰҰ: Әлем халқының бестен біріне аштық қаупі төніп тұр
Украинадағы қарулы қақтығыс басталмай тұрып-ақ, әлемнің әр оныншы тұрғыны тойып тамақ ішпейтін еді.
Алматы, NEGE. Ал шиеленістен кейін ашаршылық қаупі төнген адамдар саны айтарлықтай артуы мүмкін. Өйткені әлемде өндірілетін бидай мен арпаның 30%-і, жүгерінің бестен бірі және сұйық майдың жартысынан астамы Ресей мен Украинаның үлесіне тиесілі. Екеуі 45 мемлекетке импортталатын бидайдың үштен бірін қамтамасыз етіп келген. Алайда соғыс салдарынан фермерлер егінді жинай алмай әлек. Қарулы қақтығыс, кемежайлардың жабылуы мен санкциялар кесірінен жеткізу тоқтады. Энергияның қымбаттауына байланысты ауыл шаруашылық техникасына қажетті отын құны да шарықтап кетті. Салдарынан астықтан бөлек өзге азық-түлік те қымбаттап барады.
Антониу Гутерриш, БҰҰ бас хатшысы:
– Соғыс азық-түлік, энергетикалық және қаржы дағдарысын одан бетер ушықтырып жіберді. Коронавирус пандемиясы мен климаттың өзгеруі салдарынан ахуал онсыз да мәз емес-тін. Енді міне дамып келе жатқан елдер үшін жаңа қауіп туды. Дағдарыстың ушығуы ең алдымен тұрмысы төмен халық үшін ауыр соққы болып отыр.
