Бұрынғы Қорғаныс министрі Руслан Жақсылықовтың ұсталғаны рас па?
Telegram каналдарда бұрынғы Қорғаныс министрі Руслан Жақсылықовтың ұсталып, қамауға алынғаны туралы ақпарат тарады.
Алматы, NEGE. Бірінші болып бұл ақпаратты «Выход к правде» Telegram каналы өз дереккөздеріне сілтеме жасай отырып жариялады.
Осы ақпаратқа байланысты Бас прокуратураға, ҰҚК-ге және Қорғаныс министрлігіне ресми түсініктеме беру туралы сауал жолданды. Алайда, бұл ақпарат жарияланғанға дейін ресми органдар мұны растамады және теріске шығарған да жоқ.
Естеріңізге салайық, Руслан Жақсылықов 2022 жылы Қаңтар оқиғасынан кейін Қорғаныс министрі қызметіне тағайындалған болатын. Президент оны 2025 жылдың 8 маусымында қызметінен босатты.
Айта кетейік, оның алдындағы министр Мұрат Бектанов Қаңтар бүлігінен соң билігін асыра пайдаланды деген айыппен 12 жылға бас бостандығынан айырылған еді.
NEGE дереккөзінің хабарлауынша, бүгін таңертең Р.Жақсылықовтың үйінде тінту жүргізілген, ол қазір өз үйінде көрінеді. Әзірге оның процесуалдық статусы мен бұлтартпау шарасына қатысты нақты дерек жоқ.
