Бурабайда жүгіру мен жүзуден жарыс өтеді
Алдағы демалыс күндері Бурабайда жүгіру мен жүзуден ауқымды жарыс өтеді. 13 елдің өкілдері қатысатын шараны тамашалау үшін 100 мың адам жиналмақ, деп хабарлайды «Хабар 24».
Алматы, NEGE. Спортшылар 12 және 35 шақырым қашықтыққа жүгіреді. Ал жүзу бойынша сайыс Кіші Шабақты көлінде өтеді. Олар өз қалауы бойынша 1 немесе 3,8 шақырым қашықтықты таңдай алады. Жиналғандар тек спорттық жарыстарда бағын сынап қана қоймай, курорттық аймақта қоқыс жинауға көмектеседі. Ұйымдастырушылар салауатты өмір салтымен қатар, тазалақты сақтау қағидасын насихаттамақ.
Соңғы жарты жылда Бурабайға келген турист саны 2 есеге артып, 550 мың адамды құрағанын ескерсек, табиғатты аялау маңызды мақсаттардың бірі. Жарысты ұйымдастыруға атсалысқан «Қазақтуризм» компаниясының өкілдері мұндай жарыстар курорттарға деген қызығушылықты арттырады дейді.
