«Бұл бұрын таралып кеткен деректер» – Министр азаматтардың жеке деректерінің таралуына қатысты пікір білдірді
Цифрлық даму, инновациялар және аэроғарыш өнеркәсібі министрі Жаслан Мәдиев қазақстандықтардың жеке деректерінің таралуына қатысты пікір білдірді.
Алматы, NEGE. «Бұл деректер 2024 жылдың 1 мамырына дейін берілген. Жаңа деректердің таралуы тіркелген жоқ. Бұл бұрын таралып кеткен деректер, қазір ол деректер даркнетте қолжетімді. Олар қандай да бір Telegram арналарда пайда болған жағдайда дереу бұғаттаймыз. Бұл деректерге аздаған жаңарту енгізілген болуы мүмкін», — деп қысқа қайырды Жаслан Мәдиев Мәжіліс кулуарында.
Министрдің айтуынша, ел тұрғындарының жеке деректерінің таралып кетуі оның кезінде болмаған. Мәдиев Цифрлық даму, инновациялар және аэроғарыш өнеркәсібі министрлігін 2024 жылдың 6 мамырынан бастап басқарады.