Бүгін Рим Папасы Францискті ақтық сапарға шығарып салу рәсімі өтеді
Бүгін Ватиканда және Римде Рим Папасы Францискпен қоштасу рәсімі өтеді.
Алматы, NEGE. Понтификті еске алу үшін әлемнің түкпір-түкпірінен діндарлар мен 160-тан астам ел мен халықаралық ұйым делегациялары келеді.
Қаралы шара Астана уақытымен сағат 13:00-де Әулие Петр соборынан Папаның денесі салынған табытты шығарып, оны собордың алдына қоюмен басталады. Қызметті кардиналдар коллегиясының деканы Джованни Баттиста Ре басқарады.
Жаназа рәсімінен кейін Ultima Commendatio мен Valedictio деп аталатын қоштасу және ақтық шығарып салу рәсімдері өтеді.
Содан соң Папа Францисктің табыты салынған кортеж Рим көшелерімен жүріп өтіп, Санта-Мария-Маджоре папалық базиликасына жерлеу үшін жеткізіледі.
Базиликада жерлеу рәсімін кардинал-камерленго Кевин Джозеф Фаррелл өткізеді, содан кейін Папа Францисктің денесі жер қойнына тапсырылады.
Барлық шара Vatican News сайтында тікелей эфирде көрсетіледі, алайда жерлеу процесі көрсетілмейді.
Папа Францисктің өсиетіне сәйкес, ешқандай сән-салтанатсыз, қарапайым қабірге жерленеді.
