Бүгіннен бастап Amazon веб-сервисінің технологиялары e-Gov қызметінде пайдаланылады
Қасым-Жомарт Тоқаев Amazon корпорациясының вице-президенті Сьюзан Пойнтермен кездесті.
Алматы, NEGE. Әлемдегі ірі технологиялық компанияның өкілімен әңгімелесу барысында «бұлтты» технологияларды дамытуға және дата-орталықтар құрылысына қатысты өзара тиімді ынтымақтастықтың мүмкіндіктері талқыланды.
Президент Қазақстанның электронды үкімет саласындағы жетістіктеріне назар аударып, цифрлық саланы одан әрі жетілдіру үшін елімізге өз санатындағы ең мықты инфрақұрылымдық шешімдер қажет екенін атап өтті.
Сьюзан Пойнтер компанияның Қазақстанмен арадағы ықпалдастықты нығайтуға және келешекте бүкіл Орталық Азия аймағын қамтуға ниетті екенін жеткізді. Кездесу аясында Қазақстанның Цифрлық даму және аэроғарыш өнеркәсібі министрлігі («ҰАТ» АҚ) мен Amazon Web Services арасында Outpost «бұлтты» технология шешімін сатып алу және оны QazTech платформасымен интеграциялау жөніндегі пилоттық жобаны іске қосу туралы келісімге қол қойылды.
Бұл қадам жаһандық алпауыт елдердің дата-орталықтарын Қазақстанда орналастыруға және еліміздің өңірлік IT-хаб ретіндегі әлеуетін іске асыруға мүмкіндік береді.
«Бүгін Президентіміз Amazon корпорациясының басшылығымен кездесті. Кездесуде ұлттық технологиялардың, ІТ-саласының цифрландыруды дамытуға қалай әсер ететіні талқыланды. Нақты айтсақ, Amazon веб-сервисінің Outpost дейтін шешімінің Қазақстанның eGov.kz порталының сервистерінде бұлтты технология арқылы қолданылуы талқыланды және келісімшартқа қол қойылды. Яғни, бүгіннен бастап, Amazon веб-сервисінің технологиялары e-Government-тің бірнеше қызметінде пайдаланыла бастайды», - деді Бағдат Мусин.