Бүгін елдің барлық өңірінде сенбілік өтті
Бүгін ала таңнан ел тұрғындары сыпырғышы мен күрегін сайлап, көшеге шықты, деп жазды 24.kz
Алматы, NEGE. «Бүкіләлемдік тазалық күніне» орайластырылған іс-шараға мыңдаған қазақстандық атсалысты. Жыл сайын өтетін тазалық акциясы тұрғындардың назарын қоршаған ортаны қорғау мәселесіне аударуды, сондай-ақ қоғамда, экологиялық мәдениетті қалыптастыруды көздейді.
Астанада жалпықалалық сенбілікке 56 мыңнан аса адам жұмылды. Түске дейін 100 тоннадан астам қоқыс шығарылды. Сондай-ақ қала көшелеріне 1200-ге жуық шыбық отырғызылды. Егілген шыбық арасында қарағаш, үйеңкі, қарағай ағаштары бар.
- Өздеріңе мәлім, жылына 4,5 миллион тоннадай қатты қоқыс жиналады. Соның 27%-і ғана сұрыпталып, қайта өңделеді. Осы біздің қазіргі концепциямыз бойынша жасыл экономикаға көшу жөніндегі сонда біз 30-шы жылға осы көрсеткішті 40%-ке жеткізу көзделіп отыр. Бүгін сол жағынан жұмыс жасалынып жатыр, -деді ҚР Экология және табиғи ресурстар министрі Ерлан Нысанбаев.
