Британия бірінші болып AstraZeneca вакцинасын мақұлдады
Біріккен Корольдік Pfizer мен BioNTech компанияларының екпесін 2 желтоқсанда мақұлдаған еді. Британия бірінші болып AstraZeneca компаниясының Оксфорд университетімен бірлесе жасаған вакцинасын пайдалануға рұқсатын берді. Бұл туралы жергілікті басылымдар хабарлады.
Алматы, NEGE. Медициналық өнімдер мен дәрі-дәрмектерді бақылау басқармасы (MHRA) препаратты тексергеннен кейін ғана, үкімет осындай шешім қабылдады. Денсаулық сақтау министрі Мэтт Хэнкоктың айтуынша, енді оны егу процесі 4 қаңтарда басталуы мүмкін. Вакцинаны егу екі кезеңнен тұрады, нақтырақ айтқанда, алғаш егілгеннен кейін 3 ай өткен соң препаратты тағы бір мәрте қабылдау керек. Еске сала кетсек, 2 желтоқсанда Біріккен Корольдік Pfizer мен BioNTech компанияларының екпесін мақұлдаған еді. Британияда коронавирус дертіне шалдыққандар саны 2,38 миллионнан асты. Оның 71 мыңнан астам қаза тапты.
