Дүние
Британ премьері COVID-19-дың жаңа аса жұқпалы түрі анықталғанын хабарлады
Ұлыбритания премьер-министрі Борис Джонсон елінде коронавирустың жаңа генетикалық түрі анықталғаны және оның жұғу жылдамдығы 70%-ға жоғары екені туралы хабарлады. Бұл туралы мәлімдеген баспасөз мәслихатының бейнежазбасын премьер өзінің Twitter парақшасында жариялады.
Алматы, NEGE. «Бұл мәселе төңірегінде әлі көп нәрсе анық болмағанымен, ол вирустың алғашқы түріне қарағанда 70%-ға жұқпалы деуге болады», – деді Джонсон.
Дегенмен коронавирустың жаңа түрінің ауыр дертке шалдықтыратыны және онымен ауырғандардың арасында өлім-жітімнің жоғары болатыны жайлы деректер әзірге жоқ.
Коронавирустың жаңа түрінің кесірінен Ұлыбританияның бірқатар өңірінде аурудың тарауы күрт өсіп кеткен. Бұл туралы аптаның басында елдің денсаулық сақтау министрі Мэтт Хэнкок хабарлаған. Оның үстіне бұл елде коронавирустың жаңа түрін Лондон қаласындағы, Эссекс графтығы мен Кент және Хертфордшир графтығының кей елдімекеніндегі мыңнан астам адам жұқтырғаны белгілі болды.