Браконьерлерге тікұшақпен қуып жете алмады
Атырау облысында болған оқиға әлеуметтік желіде қызу талқыланып жатыр. Атыраулық инспекторлар браконьерлерді тікұшақпен қуып жете алмаған видеосы тарады. Ең қызығы, ескі мотоциклмен қашып бара жатқан браконьерлер видеоны өздері түсірген.
Алматы, NEGE. Ми-8 тікұшағы төбелерінен төніп келгенде браконьерлер видеоға түсіре бастаған сыңайлы. Олардың сөздерінен де, өздерінен де қорқыныш табы білінбейді.
Атыраулық «Ақ Жайық» басылымының жазуынша, қуғын Еркінқала ауылының маңында түсірілген. Браконьерлер Каспийден балықты заңсыз аулап жүрсе керек. Облыстық полиция департаменті браконьерлердің ұсталмай кеткенін мойындапты.
«Сағатына 200 шақырым жылдамдықпен ұшатын тікұшақ екі ескі мотоциклге қалай жете алмағаны жұмбақ» деп жазады басылым сайты.
