Бозымбаев: Қарағанды облысы жылыту маусымына 15 қыркүйекке дейін дайын болуы тиіс

Астана, NEGE. Теміртауда 1967 жылдан бері пайдаланылып келе жатқан ЖМ-3 жылу магистралі жаңартылып жатыр. Қазір 8,27 шақырым құбыр ауыстырылуда. Бұл желі 60 мыңға жуық тұрғынды, 312 көпқабатты үй мен 22 әлеуметтік нысанды жылумен қамтамасыз етеді.

Магистральдің тозу деңгейі 75%-ға жеткен. Соңғы бес жылда мұнда 38 ақау тіркелген.

Былтыр Теміртаудағы ЖМ-2А магистралінің 3,64 шақырымы жөнделген. Үкімет мәліметінше, содан кейін желі алғаш рет жылыту маусымын апатсыз және жылуды ажыратусыз өткізген.

Қарағандыда 50 жылдан астам уақыт бойы күрделі жөндеу көрмеген су тазарту кешені де жаңғыртылып жатыр. Нысанның тозу деңгейі 80%-ға жеткен, ал соңғы үш жылда 89 апат болған.

Құны 15,1 млрд теңге болатын жоба Қарағанды, Теміртау және Ақтас кентіндегі шамамен 695 мың тұрғынды ауызсумен тұрақты қамтамасыз етуге бағытталған.

Өңірде электр желілері мен қосалқы стансаларды жаңғырту бойынша алты жоба әзірленген. Оның төртеуі қазір жүзеге асырылып жатыр.

Қарағандыдағы М-3 жылу магистралінде 2,4 шақырым құбыр ауыстырылуда. Ол 183 мыңға жуық тұрғынды, 817 көпқабатты үй мен 611 әлеуметтік-мәдени нысанды жылумен қамтиды.

Ал М-2 магистралі мен №2 сорғы стансасын жаңғырту нәтижесінде жылыту маусымында тіркелетін ақаулар саны 36-дан екіге дейін азайған. Жоба толық аяқталса, қаланың орталық бөлігіндегі 64 мыңға жуық тұрғын тұрақты жылумен қамтылады.

Қанат Бозымбаев барлық негізгі жұмысты 15 қыркүйекке дейін аяқтап, гидравликалық сынақтар өткізіп, өңірді жылыту маусымына толық дайындауды тапсырды.

Үкіметтің мәліметінше, жобаларда қолданылатын қазақстандық өнімдердің үлесі көп жағдайда 95%-дан асады, ал кейбір нысандарда 100%-ға жетеді.

«Энергетикалық және коммуналдық секторларды жаңғырту» ұлттық жобасы 2029 жылға дейін есептелген. Оның мақсаты – коммуналдық инфрақұрылымның тозуын 40%-ға дейін төмендетіп, апат қаупін 20%-ға азайту.