«Болашақ» бағдарламасы тізімінен Бостон университеті алынып тасталды
Ғылым және жоғары білім министрі Саясат Нұрбек Үкіметте өткен брифингте бірқатар танымал америкалық университеттің неліктен «Болашақ» бағдарламасы тізімінен шығарылғанын түсіндірді.
Астана, NEGE. Оның айтуынша, соңғы жылдары дәл Бостон университетіне, Дейвистегі Калифорния университетіне және Оңтүстік Калифорния университетіне қазақстандықтар шамадан тыс көп түсе бастаған. Сонымен қатар бұл университеттерде оқуға түсуге кепілдік беретін делдал компаниялар жұмыс істеген.
«Біз бұл университеттермен келіссөздер жүргіздік, "Осындай барлық компанияны алып тастаңыздар, әйтпесе, сіздерді тізімнен шығарамыз" дедік. Бізге сапа керек. Алайда бұл университеттер құлақ аспады, сондықтан біз осындай шешім қабылдауға мәжбүр болдық», – деді Саясат Нұрбек.
Бұған дейін Саясат Нұрбек Америка Құрама Штаттарының жоғары оқу орындарына тапсыратын қазақстандық студенттер саны айтарлықтай азайғанын мәлімдеген еді. Бұған виза алудың қиындай түсуі себеп болған. Сондай-ақ министр Қазақстанда ашылған шетелдік университеттердің филиалдарына сұраныс артқанын айтып өтті.
