БҚО-да 100-ден астам адам карантинде жатыр

Алматы, NEGE. БҚО тауарлар мен көрсетілетін қызметтер сапасымен қауіпсіздігін бақылау департаменті басшысының орынбасары Нұрлыбек Мұстаевтың айтуынша, барлығы стационарда 117 адам болса, соның жетеуі облыстық жұқпалы аурулар ауруханасында емделуде. Сондай-ақ провизорлық стационарда 51, карантиндік бөлімшеде 59 адам бақылануда.

Мемлекеттік комиссияның шұғыл штабы мәлім еткеніндей, 11 сәуір күні коронавирус табылған азамат Ресейде вахталық әдіспен жұмыс істейтін БҚО-ның 37 жастағы тұрғыны болып шықты. Саратов облысымен шекарадағы «Тасқала» автоөткеліндегі санитарлық-карантиндік бекеттен өткен кезде аталған тұрғыннан жөтелу және тұмаурату белгілері анықталған.

Ол сол бойда провизорлық стационарға жеткізіліп, коронавирус табылғаннан кейін облыстық жұқпалы аурулар ауруханасына ауыстырылды. Науқаспен қарым-қатынаста болған адамдардың барлығы бақылауға алынды.