БҚО-да оқушылар мінген автобус жол апатына түсті
Жол-көлік оқиғасы бүгін Теректі ауданы Подстепное кентінде болған.
Астана, NEGE. ІІМ таратқан алдын ала мәліметтерге сәйкес, Самара – Шымкент республикалық автожолымен келе жатқан жолаушылар автобусы мектеп автобусымен соқтығысқан. Соның салдарынан соңғысы инерциямен алда тұрған автокөлікке соғылған.
Жол-көлік оқиғасынан бірнеше адам зардап шекті, олардың ішінде балалар да бар. Зардап шеккендердің барлығына медициналық көмек көрсетілді.
«Бұл факт бойынша қылмыстық іс қозғалды. Маршруттық автобус жүргізушісі уақытша ұстау изоляторына қамалды», – делінген полиция хабарламасында.
Қазіргі уақытта оқиға орнында полиция қызметкерлері жұмыс істеуде. Полицейлер барлық мән-жай анықталып, әрбір қатысушының әрекетіне құқықтық баға берілетінін атап өтті.