Бізде «шаңсорғыш» ЖОО-лар да бар екен
Білім министрлігі «шаңсорғыш» ЖОО-ларды атады. Халық арасында «шаңсорғыш» атанған университеттердің лицензияларын қайтарып алу жұмыстары жүргізіліп жатыр. Бұл туралы ҚР БҒМ Білім және ғылым саласындағы бақылау комитетінің төрайымы Гүлзат Көбенова айтты.
Алматы, NEGE. Министрліктің Facebook-парақшасында өткен онлайн-брифинг барысында ол соңғы уақытта кейбір жоғары оқу орындары неліктен «шаңсорғыш» атанып кеткендігіне тоқталды. «Себебі, бұл ЖОО-ларға басқа ЖОО-лардан немесе шетелдік ЖОО-лардан ауысып келіп жатқан студенттер өте көп. Мұндай университеттердің қатарында Қазақстан инновациялық және телекоммуникациялық жүйелер университеті, Өңірлік әлеуметтік-инновациялық университеті мен басқа ЖОО-лар бар. Бұл ретте, министрлік өз тарапынан мұндай ЖОО-лармен күресуді көздеп отыр. Осы жылы Өңірлік әлеуметтік-инновациялық университет сот шешімімен лицензиясынан айырылды.
Бүгінгі таңда 2 ЖОО-ның лицензиясы уақытша тоқтатылды. Ол - Қонаев атындағы Еуразия заң академиясы және Қазақ еңбек және әлеуметтік қатынастар академиясы»,- деді ол. Комитет төрайымы кейбір жоғары оқу орындары лицензияларының қосымшаларынан айырылғанын айтады. «Мысалы, Сырдария университеті. 4 ЖОО өз тарапынан кейбір лицензияларының қосымшаларын қайтарды. Себебі профессорлық-оқытушылық құрамы жетіспейді немесе материалдық-техникалық базасы сәйкес келмейді. Ал Талдықорғандағы Жолдасбеков атындағы экономика және құқық академиясы осы оқу жылы аяқталған соң, өз еркімен лицензиясын қайтарады», - деді Гүлзат Көбенова.