Бішкек-Ош тасжолында қар көшкіні жүріп, көлік бекеттері жабылды
Бүгін жергілікті уақыт бойынша сағат 9:30-да Жалал-Абад облысы Тоқтоғұл ауданында Бішкек-Ош тас жолының 223-шақырымында қар көшкіні жүрді.
Алматы, NEGE. Бұл туралы елдің Төтенше жағдайлар министрлігі мәлім етті.
ТЖМ хабарлауынша, қар массасының көлемі анықталып жатыр.
«Қазір бір күн бұрын қар көшкіні басып қалған Бішкек-Ош тас жолының 231-шақырымындағы учаске тазартылды. Жол жұмысшылары мен арнайы техника 223-шақырымға аттанды», - делінген хабарламада.
Қар көшкіні салдарынан Шу облысындағы «Сосновка» және Жалал-Абад облысындағы «Арал» бекеттері жабылды. Барлық көлік түрлері үшін қозғалыс уақытша шектелді.