Билл Гейтс 10 миллион доллар қайырымдылыққа аударады
Forbes журналының ең бай адамдар тізімінде мыңдаған адамның басым бөлігі қайырымдылыққа ден қоя қойған. Біз кеше Amazon басшысының жақсылық жасап сынға қалғаны жайлы жаздық. Бүгін Microsoft компаниясының негізін қалаушы Билл Гейтс 10 миллион АҚШ долларын қандай қайырымдылыққа аударатынын айтамыз.
Алматы, NEGE. Миллиардер Билл және жұбайы Мелинда Гейтс Қытайдағы коронавирустың жаңа түрлерімен күресу үшін 10 миллион доллар бөлетіндерін мәлімдеді. Қор Қытайда коронавируспен күресу үшін 5 миллион доллар аударады. Қалған 5 миллион доллар Африкадағы ауруларды бақылау және алдын-алу орталықтарына, «қара құрлықты» коронавирустың таралуынан қорғау, соның ішінде вирус скринингі, зертханалық бақылау және науқастарды емдеуге бағытталады.
Медицина мамандары коронавирустың иммунитеті әлсіз адамға тез жұғатынын және ондай адам вируспен күресе алмай қайтыс болатынын айтып, дабыл қағуда. Билл Гейтс әлеуметтік ахуал төмен «қара құрлық» халқына көмектескенде осыны ескерген сыңайлы. Қытайда туған жұқпалы вирус уақыт өткен сайын шулы тақырыпқа айналып барады. Күні кеше NEGE.KZ тілшісі аты жаман бұл вирустың Қазақстан шекарасынан 150 шақырым жерге жеткенін айтып, дабыл қаққан-ды.
