Биыл Қазақстанға Владимир Путин келуі мүмкін
Ресей Президентінің Қазақстанға сапары нақты қай күнге жоспарланғаны әзірге белгісіз.
Астана, NEGE. Владимир Путиннің бұл сапары Мемлекет басшысы Қасым-Жомарт Тоқаевтың 2025 жылғы қараша айында Ресейге барған сапары барысында қол жеткізілген уағдаластықтың жалғасы болмақ.
Бұл жөнінде Ресейдің Қазақстандағы елшісі Алексей Бородавкин «Россия 24» телеарнасына берген сұхбатында мәлімдеді.
Елшінің айтуынша, Қазақстан Президентінің Ресейге сапары «айрықша жылы әрі достық пейілде» өткен және екі ел басшысы бейресми сипатта кездесу өткізген.
«Үш сағат бойы біздің президенттің Кремльдегі пәтерінде жеке-дара, жабық жағдайда әңгімелесті. Сапардың жалпы атмосферасы айрықша жылы әрі достық пейілде өтті.
Биыл президентіміздің жауап сапары күтілуде. Күні әлі нақтыланған жоқ, бірақ болады. Басшыларға есеп беретін нәрсеміз бар деп ойлаймын», – деді Алексей Бородавкин.
Айта кетейік, Ресей Федерациясының Президенті Владимир Путин Қазақстанға соңғы рет 2024 жылғы шілдеде келген еді. Ол кезде Путин Астанаға Шанхай ынтымақтастық ұйымының саммитіне қатысу үшін келді.
