Бес баланың анасы Азия чемпионатының жартылай финалына шықты
Әйгерім Сәттібаева алғашқы кездесуінде жеңіске жетіп, Азия чемпионатының жартылай финалына жолдама алды, деп хабарлайды Qazaqstan телеарнасы.
Алматы, NEGE. Отандасымыз 48 келі салмақ дәрежесінде сынға түсіп, қарсыласы филиппиндік Магно Офелионы жеңді. Жартылай финалда өзбек қызы Фарзона Фазиловамен қолғап түйістіреді.
Әйгерім Сәттібаева – көпбалалы ана. Ол жақында ғана спортқа қайта оралып, Қарағанды қаласында өткен «Мықтылар турнирінде» жеңімпаз атанды.
Айта кетейік, Тайландта өтіп жатқан Азия чемпионатында Қазақстан құрамасының 10 боксшысы жартылай финалға шықты. Олар: Дулат Бекбауов, Диас Молжігітов, Абылайхан Жүсіпов, Әйгерім Сәттібаева, Аида Әбікеева, Елдана Талипова, Милана Сафронова, Ұлжан Сәрсенбек, Айбек Оралбай, Бекзад Нұрдәулетов.
