«Шымкент әкімінің тапсырысын орындадым деп айтуға мәжбүрледі» – Берденов айыпталушының мәлімдемесіне қатысты пікір білдірді
Бүгін Шымкент қаласы әкімінің орынбасары Руслан Берденовке қастандық жасады деп айыпталып жатқан Ернар Жиембайдың сотта берген мәлімдемесінен кейін Руслан Берденовтің өзі ресми мәлімдеме жасады.
Алматы, NEGE. Руслан Берденов бұл жағдайдың тек қызметіне қатысты екенін ерекше атап өтті. Оның айтуынша, Ернар Жиембай өз міндеттерін адал атқармаған, наразылықтың басты себебі де содан шыққан.
Берденов қызғанышқа қатысты болжамды түбегейлі жоққа шығарды.
- Тақырыпқа орай: «Әйеліме лайк басып, комплименттер жазып жүрді» – Ернар Жиембай Руслан Берденовке не себепті оқ атқанын түсіндірді
«Сотта жауапкер Жиенбай тарапынан айтылып жатқан мәлімдемелерге үнсіз қалу мүмкін емес. Бұл тек қана шантаж және қысым көрсету әрекеті. Соңғы рет мен оны сол күні, дәл өзі аңшы мылтығынан атып кеткен кеште көрдім. Одан кейін бізде ешқандай байланыс болған жоқ.
Кейінірек ол өкілдерімен бірге менің қорғаушыларыммен байланыс орнатуға тырысып, «достасуды» ұсынды. Кешірім берілсе, шу көтермейміз деді, ал бас тартқан жағдайда «ақпараттық жарылыс» жасаймыз деп сес көрсетті. Тіпті, айыпталушының әкесі өзін-өзі өртейді деген мәлімдеме жасалатынын айтты. Мұны мен тікелей қысым деп бағалаймын.
Мен қандай да бір қысым мен арандатуға жол бермедім.
Бастапқы ұстанымым өзгерген жоқ. Қақтығыстың түп-төркіні – кәсіби, қызметтік сипатта. Жауапкер келісім аясындағы жұмысын адал атқарғысы келмеді, есеп беруден жалтарды. Мен тек ашықтық пен міндеттемелердің орындалуын талап еттім.
Ал қоғам назарын «қызғаныш», «жеке қатынас», «жұбайы» секілді жалған себептерге бұру - манипуляция, шындықтан алыстату.. Ол мен үшін тек мердігер болатын», – деп жазды Берденов.
Руслан Берденов сотталушының қала әкіміне қатысты айтқан мәлімдемесін жоққа шығарды.
- Тақырыпқа орай: «Оқ атуға Шымкент әкімі тапсырыс берді деп айтуға мәжбүрледі» – Күдікті сотта өз шындығын айтты
«Бұдан да сорақысы – бүгінде бұл жалған мәлімдемелерге қала әкіміне қатысты тұстарды да қосып жатыр. Бұл тағы да істің ақиқатқа емес, қысым көрсету мен беделге нұқсан келтіруге бағытталған өрескел манипуляция екенін дәлелдейді. Мен мұндай мәлімдемелерді үзілді-кесілді жоққа шығарамын және оларды мойындамаймын. Менің ұстанымым өзгермейді. Депутаттық өкілет мерзімі аяқталған соң да, мемлекетке адал қызмет ету жолынан тайған жоқпын. Соңғы үш жылымды осы жолға арнадым. Қала әкімінің шақыруымен әкімдікке келіп, ашық, адал жұмыс істеуге, халыққа шынайы көмек көрсетуге күш салдым», – делінген Берденовтің жазбасында.
Әкім орынбасарының айтуынша, ол өзіне жасалған шабуыл салдарынан сот отырыстарына қатыса алмаған. Руслан Берденов бұл жағдайдың оның денсаулығына елеулі әсер еткенін атап өтті.
