Белгілі дәрігер Камал Ормантаев дүниеден өтті
Ұлттық Ғылым академиясының академигі, Мемлекеттік сыйлықтың лауреаты Камал Ормантаев дүниеден озды.
Алматы, NEGE. Қаралы хабарды Facebook желісінде марқұмның ұлы Жарас Ормантаев естіртті.
«Бүгін түнде ардақты әкем, қазақстандық балалар хирургиясының негізін қалаушысы – академик Камал Ормантаев өмірден озды» , – деп жазды Жарас Ормантай.
Қазақстанның балалар хирургиясы, педиатрия, травматология мен анестезиологиясының негізін қалаушы Камал Ормантаев 1936 жылы 11 қыркүйекте Қызылорда облысының Қармақшы ауданында дүниеге келген.
Жоғары білікті балалар хирургі Камал Ормантаев көкірек қуысы, өкпе, өңеш, құрсақ қуысы, бас сүйек пен бүйрек мүшелеріне жиырма төрт мыңға жуық күрделі ота жасаған.
Камал Ормантаев 320-дан аса ғылыми жұмыстардың, балалар хирургиясы бойынша кеңестік нұсқаулардағы 9 тараудың және 9 монографиянығ авторы.
Дәрігер II дәрежелі «Достық», III дәрежелі «Барыс» және «Парасат» ордендерімен марапатталған.
NEGE редакциясының ұжымы академик К.Ормантаевтың отбасына, туған-туыстарына қайғырып көңіл айтады.