Бектенов Конституциялық сот шешімін «инвесторлар үшін игілікті қадам» деп атады
Премьер-министр Олжас Бектенов Инвестициялық ахуалды жақсарту жөніндегі кеңес отырысында Конституциялық соттың таяудағы жоғары лауазымды тұлғалардың бір реттік өкілеттік мерзіміне қатысты түсіндірмесіне пікір білдірді.
Астана, NEGE. Бектеновтің пікірінше, Конституциялық сот өз шешімімен нақты әрі дәл түсіндіріп берді.
«Бір реттік өкілеттік мерзімге қатысты норма жаңа Конституция күшіне енгеннен кейін, яғни биылғы 1 шілдеден бастап тиісті лауазымдарға тағайындалған немесе сайланған тұлғаларға ғана қолданылады. Құқықтық айқындылықтың қамтамасыз етілуі ішкі және сыртқы аудиторияны толғандырған бірқатар мәселені күн тәртібінен алып тастайды. Менің ойымша, бұл саяси-құқықтық жүйенің тұрақтылығы мен болжамдылығына ерекше мән беретін инвесторлар үшін де игілікті қадам болып отыр», – деп атап өтті премьер-министр.
Сондай-ақ ол президенттік реформалар жұртшылық тарапынан қолдауға ие болып жатқанын атап өтті.
