Bazis құрылыс компаниясының негізін қалаушы Беловичтің өгей қызы өзіне қоқан-лоқы жасалып жатқанын мәлімдеді
Лара Эртл Instagram парақшасында өзіне өгей әкесі Беловичтің тарапынан айтылған қорқыту сөздері жазылған видео жариялады.
Алматы, NEGE. «Маған өгей әкем, Forbes тізіміне енген миллиардер, Bazis құрылыс компаниясының негізін қалаушы Александр Белович қоқан лоқы көрсетіп жатыр. 2025 жылдың 22 шілдесінде сағат 19:00-де біз Ritz Carlton қонақүйінің клуб-залында кездестік. Сол жерде ол бірнеше рет мені және отбасымды өлтіремін деп қорқытты. Сондай-ақ, анама қолдан жасалған қылмыстық іс бойынша өзімізді ашық қорғауға тырыссам, мені жоқ қылатынын қайталап айтты. Мені қорқытып-үркіткен әңгімелерінің аудиосы, видеосы және телефон арқылы сөйлескеніміз бар», - деген жазба қалдырды Лара Эртль.
Алматы қалалық Полиция департаменті Nege.Aqsha редакциясына қылмыстық іс қозғалғанын растады. Қазіргі уақытта тергеумен Бостандық аудандық полиция басқармасы айналысып жатыр.
«Істің шынайы мән-жайын анықтауға және заңнамаға сәйкес шара қолдануға бағытталған кешенді тергеу амалдары жүргізілуде», - делінген ведомствоның ресми хабарламасында.
Редакция Александр Беловичтің де пікірін тыңдауға дайын.
