Базарбек шетелде қалып қойған «Болашақ» түлектерінен қаржыны қайтаруды талап етті
Мәжіліс депутаты Бакытжан Базарбек «Болашақ» бағдарламасы бойынша оқуға кетіп, шетелде қалып қойған түлектерден бюджетке оларға жұмсалған қаржыны қайтаруды талап етті.
Астана, NEGE. Базарбектің сөзінше, бұл салада әлі күнге түйіні тарқамаған түйткіл көп. Кейбір «Болашақ» стипендиаттары мемлекет қаржысын алып, біліктілігін арттырды, бірақ Қазақстанға оралып, осында жұмыс істегісі келмейді.
Депутаттың сөзінше, бұл түлектердің қаржыны қайтарған-қайтармағаны, келісімшарттарының тағдыры және оларға қандай шара қолданылғаны әлі де беймәлім.
Сондай-ақ ол бағдарлама бойынша шәкіртақыны көбейту керек деген ұсынысты орынсыз деп санайды.
«Әңгіме миллиардтаған заңбұзушылықтар туралы болып тұрғанда мен мұны ақталған қадам деп санамаймын», – деді ол.
Еске салсақ, бұған дейін Халықаралық бағдарламалар орталығы «Болашақ» студенттеріне шәкіртақыны 10–15%-ға арттыру мүмкіндігі туралы мәлімдеген. Орталық ақпарынша, төлемдер 15 жылдан астам уақыт бойы өзгермепті.
