Байзақтағы жарылысқа кінәлі деп танылған сарбаздар мемлекетке 23 миллиард теңге төлеуге міндеттелді
Шымкенттің азаматтық істер жөніндегі ауданаралық сотында Жамбыл облысы Байзақ ауданындағы әскери бөлімдегі жарылысқа кінәлі деп сотталған сарбаздар Әсет Әшірбай мен Ерпулат Тұрановқа және офицерлер Аслан Бақытжанов пен Руслан Несіпқалиевқа міндеттелген жарылыс шығынын өтеуге қатысты сот өтті.
Алматы, NEGE. Сот қорғаныс министрлігінің 4 жауапкерден 25 093 038 236 теңге материалдық залалды өндіру туралы талабын ішінара қанағаттандырып, сотталған әскерилерді 23 миллиард 700 миллион теңге төлеуге міндеттеді. Дәлел болмағандықтан, қалған 1 328 507 355 теңгені төлемейді.
«Сот 28349 әскери бөлімінің техникалық аумағында №14 инженерлік оқ-дәрілер қоймасында жарылыс жауапкерлердің әрекеті нәтижесінде орын алғанын ескере отырып, олардан материалдық шығынды бірлесіп өндіру қажет деп санады. 23 764 530 881 теңге өндірілді. 1,3 миллиард теңгенің материалдық шығыны талап дәлелдемелерінің жоқтығынан бас тартылды», – делінген сот хабарламасында.
Шешім заңды күшіне енген жоқ.
