Байқоңырда 40 жастағы әйел бес баласына қатыгездік көрсетіп келген деген күдікке ілінді
Байқоңырда 40 жастағы әйелге қатысты кәмелетке толмаған бес баласына қатыгездік көрсету дерегі бойынша қылмыстық іс тергеліп жатыр. Прокуратура қылмыстық істі заңды деп таныды.
Астана, NEGE. «Байқоңыр» кешені прокуратурасының мәліметінше, күдікті 2026 жылдың басынан бері бес баласының тәрбиесіне жауапсыз қарап, оларға қатыгездік көрсетіп келген.
Сондай-ақ әйелдің балаларының денсаулығына, рухани және адамгершілік тұрғыдан дамуына қамқорлық жасау, олардың негізгі жалпы білім алуын қамтамасыз ету міндеттемелерін тиісті деңгейде орындамағаны атап өтілген.
Бұл дерек бойынша Ресей Қылмыстық кодексінің «Ата-ананың кәмелетке толмаған баланы тәрбиелеу жөніндегі міндеттерін тиісінше орындамауы» бабымен қылмыстық іс қозғалған. Қазір тергеу амалдары жүргізіліп, оқиғаның мән-жайы анықталып жатыр.