Батыс Қазақстанда тағы бір ұшқышсыз ұшатын аппараттың бөлшектері табылды
Батыс Қазақстан облысы Казталов ауданы аумағына ұшқышсыз ұшатын аппарат құлағаны туралы ақпарат тарады.
Алматы, NEGE. БҚО полиция департаментінің баспасөз қызметінен мәлім еткеніндей, ұшқышсыз ұшатын аппараттың бөлшектеріне ұқсас заттың табылуына байланысты уәкілетті қызметтермен бірлесіп тексеру іс-шаралары жүргізіліп жатыр.
— Нысан елді мекеннен алыс аумақтан табылған. Қазіргі кезде оқиғаның барлық мән-жайы анықталу үстінде, — деп хабарлады ведомстводан.
Тұрғындардың сөзіне қарағанда, оқиға 27 наурыз күні кешкісін Көктерек ауылдық округі аумағында болды. Ұшқышсыз ұшатын аппарат бөлшектері Саралжын (Киров) елді мекенінен 10 шақырымдай қашықтықта түскен.
Бұдан бұрын осындай оқиғалар Бөкей ордасы ауданы Ұялы, Тасқала ауданы Атамекен және Жәнібек ауданы Ұзынкөл, Қамысты ауылдары маңында болған еді.