Баталовтың баспасөз хатшысы тағайындалды
Алматы облысы әкімдігінің баспасөз хатшысы тағайындалды. Бұған дейін 8 жыл осы қызметті атқарған Айдар Карбозұлы Башбаев кеше бұрынғы жұмысына қайта кірісті.
Алматы, NEGE. Айта кету керек, Айдар Башбаев осыдан үш жыл бұрын облыстық тілдерді дамыту басқармасына басшы болып тағайындалған еді. Ол өзінің Фэйсбуктегі парақшасында 3 жыл бірге еңбек еткен ұжымына алғыс білдіріпті.
«Тіл – халықтың өткені мен бүгіні. Ұлттың тарихының таңбасы саналатын тіл саласында қызмет атқару – кез-келген адамға бұйыра бермейтін бақ. Бұл бағытта еңбек ету мен үшін зор мәртебе әрі мол тәжірибе болды.
Осы салада қызмет етуіме үлкен сенім білдірген облыс әкімі Амандық Ғаббасұлы Баталовқа және барша зиялы қауымға, тіл жанашырларына, филолог-ғалымдарға, әріптестеріме алғысым шексіз!
Мемлекеттік тілдің мәртебесін көтеру, қолданыс аясын кеңейту мақсатында атқарылған жұмыстар аз емес, оған жұрт куә. Болашақта да ана тіліміздің өміршеңдігі үшін әлі талай жұмыстар атқарылатынына сенімім мол.
Баршаңыздың дендеріңізге саулық, отбасыларыңызға амандық, шығармашылық табыс тілеймін!
Ең бастысы – еліміз бүтін, жұртымыз аман болсын!» деген.
