Бас прокуратура «СК-Фармацияға» қатысты тергеу бастады
Бұл туралы Мәжіліс депутаты Бақытжан Базарбек Facebook парақшасында хабарлады.
Алматы, NEGE. Оның айтуынша, Бас прокуратура мен Қаржы мониторингі агенттігі аталған компанияға қатысты сотқа дейінгі тергеп-тексеру жұмыстарын бастаған.
«Мұрат Әбеновпен бірге Жоғары аудиторлық палата (ЖАП) анықтаған деректер бойынша Бас прокуратураға жолдаған өтінішімізден кейін, прокурорлар құқық қорғау органдарымен бірлесіп «СК-Фармация» ЖШС мен фармацевтикалық сала субъектілеріндегі ұрлық фактілері бойынша қылмыстық тергеп-тексеруге кірісті», – деп жазды Базарбек.
Анықталған заңбұзушылықтардың ішінде:
– «Инфекцияға қарсы препараттар ғылыми орталығы» АҚ (бұдан әрі – Қоғам): жалған клиникалық зерттеулер жүргізіп, 166,4 млн теңгеге дәрі-дәрмек бойынша қаражат игерілген; шын мәнінде алынбаған жабдыққа 36,7 млн теңге негізсіз жұмсалған.
– «СК-Фармация» ЖШС (Бірыңғай дистрибьютор) дәрі-дәрмек сатып алу кезінде мемлекетке 35,8 млрд теңге мөлшерінде залал келтірген.
– «КазМедПром» ЖШС медициналық қолғаптарды Бірыңғай дистрибьюторға қымбат бағамен жеткізу арқылы 5,3 млрд теңге бюджет қаражатын тиімсіз пайдаланған
Аталмыш фактілер қазіргі уақытта тергеу органдары тарапынан тексерілуде.