Бас прокуратура Шерзаттың үйін өртегендерді ғарыштан түсірілген суреттер арқылы анықтайды
Бас прокуратура өрт болған кезде Шерзат Болаттың үйінің маңында қандай көліктер тұрғанын спутниктік суреттер арқылы анықтамақ.
Алматы, NEGE. «Сотқа дейінгі тергеп-тексеру жүріп жатыр. Екіден көп сараптама жүргізілді деп айта аламын. Бұл сараптамалардан белгілі бір нәтиже болды. Қазіргі уақытта тексерудің не себепті тоқтап қалғанын айта аламын. Біз Ресей Федерациясына халықаралық тергеу тапсырмасын жолдадық, сондықтан үзіліс болды. Біз спутник арқылы сол кезеңде Шерзат Болаттың үйінің маңында қандай көліктер тұрғанын зерттегіміз келеді. Бұл зерттеу ісіміздің толық әрі нақты болуы үшін қажет», – деді Сенат кулуарында Бас прокурордың орынбасары Ғалымжан Қойгелдиев.
Ол суреттерді біраз күтуге тура келетіндіктен тергеу ұзаққа созылатынын айтты.
Бүгін Талдықорғанда Шерзат Болаттың өліміне қатысты іс бойынша сот отырысы басталды.
