Баласын батареяға байлап қойып ұрған: сот әйелді емделуге жіберді

Астана, NEGE. Іс материалдарына сәйкес, 18 қаңтарда әйел ваннадағы суды ашық қалдырғаны үшін ұлын жазалаған: оны батареяға байлап қойып ұрып-соққан. Бала дене жарақаттарын алған.

Бұл жайтты отбасының танысы видеоға түсіріп, әкесіне жіберген. 

Сотта айыпталушының кінәсі куәгерлердің айғақтарымен, бейнежазбамен және сараптама қорытындыларымен дәлелденді.

Әйелге «кәмелетке толмаған баланы қинау» бабымен айып тағылды. Алайда сараптама оның туа біткен психикалық ауытқуы бар екенін анықтады. Оқиға кезінде ол өз әрекеттерінің мәнін түсінбеген және сот процесіне қатысуға қабілетсіз деп танылды.

Сот әйелді қылмыстық жауапкершіліктен босатып, жалпы психиатриялық стационарда мәжбүрлеп емдеуге үкім шығарды.

Балалар мамандандырылған мекемеге орналастырылды.

Шешім әзірге заңды күшіне енген жоқ.