Балаларға екпе салу басталды

Алматы, NEGE. Куба 2 мен 18 жас аралығындағы балаларға отандық «Соберана-2» вакцинасын сала бастады. Сынақтар аталған екпенің қауіпсіз екенін дәлелдеген. Ал ересектер жергілікті мамандар жасаған «Абдала» атты екінші екпені қабылдайды. Қазір 11 миллион 300 мың тұрғынның жартысына жуығы бірінші дозаны, ал 3 жарым миллионнан астамы 2 дозаны да салдырған. Билік осы айдың аяғына дейін халықтың 90 процентін вакциналап үлгереміз дейді. Өткен аптада Кубада күніне 7 мың адам індет жұқтырып, 70-80 кісі көз жұмған болатын. Мамандар бұл 100 мың тұрғынға шаққанда әлемдегі ең жоғары көрсеткіштердің бірі деп есептейді.

Виценте Верез Бенкомо, Финли вакциналар институтының директоры:

Біз вакцинаны балалардың ерекшеліктерін ескере отырып, жасадық. Себебі біздің Финли институты нақты осы бағытқа маманданған. Біз бірінші және екінші кезең бойынша Гаванада жүргізілген клиникалық сынақтар барысында алынған дәлелдерге сүйендік. Бұл вакцинаны өте қауіпсіз деп сеніммен айта аламыз.