Балалар үйінің тәрбиеленушілерінен 10 млн теңгедей ақша бопсалаған

Астана, NEGE. ІІМ-нің ақпараттық медиа-порталында жарияланған мәліметке сәйкес, 8 қаңтарда Қарағанды қаласында әлеуметтік осал санаттағы азаматтарға арналған арнайы мемлекеттік төлемдерден ақша бопсалаған ұйымдасқан топтың заңсыз әрекеті әшкереленді.

«Жедел іс-шаралар барысында өңірдегі балаларға арналған мекемелердің бірінің тәрбиеленушілері қылмыскерлердің құрбаны болғаны белгілі болды», – делінген хабарламада.

Полицейлердің мәлімдеуінше, соңғы жарты жыл ішінде күдіктілер алдау, қорқыту және физикалық күш қолдану арқылы бірнеше жәбірленушіден жалпы сомасы 10 миллион теңгеден астам қаражатты иемденген.

«Оларды арнайы шоттардан ақша шешуге, сондай-ақ микроқаржы ұйымдарында несие рәсімдеуге мәжбүрлеген», – дейді полицейлер.

Жедел-іздестіру іс-шаралары кезінде күдіктілерден автоматты атыс қаруына арналған оқжатарлар және жүзден астам оқ-дәрі тәркіленген.

«Аталған дерек бойынша бопсалау белгілерімен сотқа дейінгі тергеп-тексеру басталды. Барлық күдікті ұсталды. Оларға 10 жылға дейін бас бостандығынан айыру жазасы тағайындалуы мүмкін», – делінген ІІМ хабарламасында.

Қазір полицейлер күдіктілердің осыған ұқсас басқа да қылмыстарға қатысы бар-жоғын анықтау жұмыстарын жүргізіп жатыр.