Бақытжан Байжанов жазасын жеңілдету туралы сотқа түсірген арызын қайтарып алды
Жоғарғы сот Байжановтың 26 тамызда өтінішін қайтарып алғанын растады.
Алматы, NEGE. «26 тамызда Байжанов сот актілерін қайта қарау туралы кассациялық өтінішін қайтарып алды. Өтінішті алдын ала қарау жүргізілмейді. Өтінішті қайтару туралы ресми қаулы 4 қыркүйекте шығады», – делінген хабарламада.
Естеріңізде болса, 13 мамырда Астанада Салтанат Нүкенованың өліміне қатысты сот процесі аяқталды. Сот бұрынғы ұлттық экономика министрі Қуандық Бишімбаевты әйелін азаптап, өлтіргені үшін кінәлі деп тауып, 24 жылға соттады.
Оның інісі Бақытжан Байжанов қылмысты жасырғаны үшін кінәлі деп танылып, төрт жылға бас бостандығынан айырылған болатын. Ал 26 маусымда сот алқасы Бишімбаев пен Байжановтың апелляциялық шағымы бойынша үкімдерін өзгеріссіз қалдырды.