БАҚ: Нұрлан Сабуровқа Ресейге 50 жылға кіруге тыйым салынды
Бұған әзілкештің Ресейдің арнайы әскери операциясын сынауы, көші-қон және салық заңнамасын бұзғаны себеп болған.
Астана, NEGE. Қазір ол Внуково әуежайында елге кіре алмай отыр, деп жазады Telegram-дағы Mash арнасы.
Нұрлан Сабуровты әуежайдағы тексеру кезінде тоқтатып, Ресей Федерациясына кіруге тыйым салған.
Арна мәліметінше, әзілкеш Дубайдан ұшып келген, бірақ билет алуға ақшасы жоқ болғандықтан кері қайта алмай отырған көрінеді.
Ал Сабуровтың өзі бұл жағдай туралы әзірге ешқандай мәлімдеме жасаған жоқ.
Еске салсақ, бұған дейін Нұрлан Сабуровтың Шереметьево әуежайында көші-қон заңнамасын бұзды деген айыппен ұсталғанын жазған едік. Ол кезде Ресей Федерациясынан кетіп, көші-қон заңнамасына сай талаптарды сақтап, Ресейге қайта кіру үшін екі апта уақыт берілген.