Байден мен Маскты сан соқтырған хакер ұсталды
Бірнеше Twitter-парақшаны бұзған жасөспірім хакер кәмелетке толмағандарға арналған колонияға үш жылға бас бостандығынан айырылды, – деп хабарлайды Daily Mail басылымы.
Алматы, NEGE. Грэм Иван Кларк серіктестерімен бірге адамдарды алдау арқылы биткоин алу үшін 130 танымал компания мен жеке тұлғаның Twitter-парақшасын бұзған. 2020 жылдың 15 шілдесінде Twitter-дегі бұзақылықтың құрбаны болғандар қатарында Барак Обама, Джо Байден, Билл Гейтс, Илон Маск, Джефф Безос және Канье Уэст бар.
Олар Apple мен Uber-ге тиесілі сайттарды да бұзды. Кейін Кларк барлығының атынан қолданушыларға сандық валютадағы жинақтарын екі есе көбейтуге уәде беретін әйгілі алаяқтық схеманы жариялай бастаған.
Тергеу мәліметтері бойынша, жасөспірім криптовалютада 180 мың доллардан (шамамен 75 миллион теңге) аса сомаға биткоин алған. Кейін бұл схема анықталып, жабылды.
Флорида штатының прокуратурасы жасөспірімге қатысты 30 іс қозғады. Қылмыс кезінде Кларк 17 жаста болған. Бұл жазаны жеңілдетуге көмектесті. Бапта қарастырылған ең төменгі жаза - 10 жылға бас бостандығынан айыру. Кларк болса 3 жылға сотталды. Түрмеде жазасын өтеуден бөлек, жасөспірім өзінің барлық есептік жазбасын тапсыру керек. Сондай-ақ, Кларк компьютерді тек бақылауда қолдана алады.
Twitter басшылығы бұл шабуылға қатысты ішкі тергеу жүргізіп, хакерлер телефон арқылы алдау әдісін қолданғанын анықтады.
