Дүние
Байден Беларуське санкция салады
АҚШ Беларусь мемлекетіне санкция салуды қарастырып отыр.
Алматы, NEGE. Бұл туралы Құрама Штаттар президенті Джо Байден мәлімдеді. Бірақ ол қабылданатын санкцияларға қатысты толық ақпарат беруге әлі ерте екенін ескертті. Сондай-ақ Ақ үйдің баспасөз хатшысы Джен Псакидің айтуынша, Байден Беларусь мәселесін 16 маусымда Ресей басшысы Владимир Путинмен кездесуінде көтереді.
Естеріңізге сала кетейік, 23 мамырда Афинадан Вильнюске бет алған "Райн-Эйр" компаниясының ұшағы шұғыл түрде Минскіге қонған еді. Оған ұшақ бортында жарылғыш зат болуы мүмкін деген хабар түрткі болған. Бірақ бұл ақпарат расталмады. Кейін осы ұшақпен Вильнюске бара жатқан "Нехта" телеграмм-арнасының бұрынғы бас редакторы, Александр Лукашенко режиміне ашық қарсы шыққан Роман Протасевич қамауға алынды. Осыған байланысты ондаған мемлекет пен халықаралық ұйым Беларусь билігін қатаң сынға алып, Батыс елдері мен Сингапурдың әуе компаниялары Беларусь кеңістігін пайдаланудан бас тартқан.