Бағдат Мусиннің жұбайы бір жылда 35 млн теңгеден астам табыс тапқан
Квазимемлекеттік және ұлттық компаниялар қызметкерлерінің кірістері туралы декларацияларды жариялай бастады.
Астана, NEGE. «Қазақтелеком» АҚ басқарма төрағасы, Цифрлық даму министрлігінің бұрынғы басшысы Бағдат Мусин 2024 жылы қосымша табыс болмағанын көрсеткен. Ал оның жұбайы Дина Ауғанбаева сол жылы 35 млн теңгеден астам кіріс тапқанын мәлімдеді.
«Бәйтерек» холдингінде басқарма төрағасының орынбасары Тимур Оңжанов 2024 жылы 17,4 млн теңге табыс тапқан.
«ҚазМұнайГаз» ұлттық компаниясы басшылығының да кірістері жарияланды. Басқарма төрағасы Асхат Хасеновтің жұбайы Гүлназ Хасенова құжатта 7 млн теңге табыс тапқанын көрсеткен.
Басқарма төрағасының орынбасары Диана Арысова 18,9 млн теңге табыс тапқанын мәлімдесе, оның жұбайы Серік Бегімбетов бар болғаны 37 мың теңге көрсеткен. Тағы бір төраға орынбасары Руслан Балықбаев 4,2 млн теңге табыс тапқан.
Қаржы департаментінің директоры Марат Диқанбаев 12,6 млн теңге, ал топ-менеджер Болат Закиров 6,8 млн теңге кірісін көрсеткен.
Ал «Қазатомөнеркәсіп» ұлттық атом компаниясында басқарма төрағасының орынбасары Марат Төлебаев 1,7 млн теңге, қаржылық бақылаушы Дархан Әбдімолдаев 1,8 млн теңге табыс тапқанын жариялады.
