Азия банкі Алматыда «жасыл» экономиканың дамуын қолдайды
Алматы қаласының әкімі Ерболат Досаев пен Азия даму банкінің (АДБ) президенті Масацугу Асакава «жасыл» экономиканы енгізуді және қалалық ортаны жақсартуды талқылады.
Алматы, NEGE. АДБ қатысуымен 31 мамырда ЖЭО-2 жаңғырту туралы келісім жасалды. ЖЭО-2 табиғи газға ауыстырылғаннан кейін зиянды шығарындылар жылына 37,3 мың тоннадан 2,7 мың тоннаға дейін немесе 90%-ға азаяды. Жобаның Алматыда ауа сапасын жақсартуға және тазартуға қосатын үлесі зор болады.
Қоғамдық көлікті жаңғырту есебінен шығарындыларды жылына тағы 2 мың тоннаға азайту жоспарланған. Ол үшін 200 жаңа троллейбус сатып алынып, 1,2 мың дизельді автобус газ және электр тартыман ауыстырылады. Газбен жүретін автобустарға қызмет көрсету үшін арнайы 2 автобус паркі мен 5 газ құю станциясы салынады.
Алматы әкімдігі мен АДБ арасындағы одан әрі ынтымақтастық LRT желісін салу, электр автобустарын сатып алу және зарядтау станцияларын құру, тұрғын үй қоры мен қоғамдық ғимараттардың энергоаудитін жүргізу саласында болуы мүмкін.
Орталық Азия осы жаһандық проблеманы шешуде шешуші рөл атқаруы тиіс және Азиялық Даму банкі климатты қаржыландыруда 2019-2030 жылдар кезеңіне 100 млрд АҚШ доллары мөлшерінде қаржы бөліп отыр. Бұл жылына 8,8 млрд доллар шамасында.
«Жасыл» экономиканың басты міндеті – қоршаған ортаға келетін зиянды азайту. Бүгінде бүкіл әлем «жасыл» экономикаға бет бұруда. Мамандардың айтуынша, «жасыл» экономиканы дамыту елімізге экологиялық дағдарыстан қашып құтылуға мүмкіндік береді.
