Азия чемпионаты: Қазақстан жастар құрамасы 11 медаль жеңіп алды
Малайзияның Кучинг қаласында өтіп жатқан жастар арасындағы таэквондодан Азия чемпионатында Қазақстан құрамасы жарыстың екінші күнінде төрт медаль иеленді.
АЛМАТЫ, NEGE. 68 келі салмақта Аружан Найманбаева алтыннан алқа тақты. Ал Ринат Елібай (51 келі), Павел Эм (59 келі) және Ақбота Желеу (46 келі) қола жүлдегер атанды.
Бұған дейін Бунед Бахрамкулов (45 келі) пен Айым Серікбаева (42 келі) Азия чемпионы атанған болатын. Сонымен қатар, Тоғжан Қазнабек (59 келі) күміс медальға ие болса, Нұрперзент Самаұлы (48 келі), Егор Шаптефраць (78 келіден жоғары), Дәулет Рахимоллиев (73 келі) және Любовь Юн (63 келі) қола жүлде еншіледі.
Айта кетсек, 2005 жылы Алматыда өткен Азия чемпионатында Давранбек Ризаев жеңіс тұғырына көтерілген еді. Араға 20 жыл салып, Айым Серікбаева, Бунед Бахрамкулов және Аружан Найманбаева Қазақстанның атын алтын жүлдемен қайта асқақтатып отыр.