Әжейдің 100 млн теңгесін жымқырған ұрылар қорапта қалған аяқ іздері арқылы табылды
Әжейдің 100 млн теңгесін жымқырған ұрыларды криминалист қорапта қалған аяқ іздері арқылы анықтады, деп хабарлайды Polisia.kz.
Алматы, NEGE. 2023 жылғы маусымда Петропавл қаласындағы пәтерлердің біріне қоңырау соғылды. Егде жастағы әжей есікті ашты. Босағада суға арналған «Аквафор» сүзгісі құрылғысын тиімді жеңілдікпен орнатуды ұсынған екі жас жігіт тұрды.
Ақкөңіл әжей шақырылмаған қонақтарды үйге еш алаңдамастан кіргізеді. Жас жігіттер уәде еткен жұмысты орындап, еш күдік тудырмады. Әжей көрші бөлмеден ақша алып шығып, орнатқан құрылғы үшін төлем жасайды.
Осы сәтте жігіттердің бірі ақша жасырылған жерді байқап қалған еді. Алаяқтар әжейді алдамаққа бекінеді. Олардың біреуі әжейді сөзге айналдырса, екіншісі көрші бөлмеге өтіп, 100 млн теңге қаражатты жымқырқған.
Жігіттермен қоштасқан әжей ақшаның қолды болғанын да сезбей қалады. Ақшаның ұрланғаны туралы бірнеше күн өткеннен кейін белгілі болды.
Құрамында Петропавл қаласының ПБ ЖКБ аға криминалисі Ербол Мусин бар полиция қызметкерлері оқиға орнына келген бойда қылмыстың мән-жайы туралы нақтылай бастады. Ербол пәтерді мұқият қарап шығып, алаяқтар қалдырған сүзгі құрылғысының қорабынан іздерді тапты.
Іздер бойынша қылмыскерлердің жеке басы да анықталды. Олар Қостанай облысының тумасы болып шықты және біреуінің Петропавл қаласында тұрақты тұратыны белгілі болды.
Криминалистің кәсіби іс-қимылы негізінде қылмыс қысқа мерзімде ашылды, ұрылар ұсталып, ақшалай қаражаттың бір бөлігі әжейге қайтарылды.