Дүние
Әзербайжанда қай партия жеңіске жетті?
Президент Илхам Алиев басында тұрған биліктің «Жаңа Әзербайжан» партиясы мерзімінен бұрын өткен сайлауда жеңіске жеткенін жариялады.
Алматы, NEGE. Экзит-полл қорытындысына қарағанда, партия парламенттегі 125 орынның 71-ін алған. Жексенбіде өткен сайлауда азаматтардың 48 пайызы дауыс берген. Бұл осыған дейінгі сайлаулардың ішінде ең төменгі көрсеткіш болған. Еуропадағы қауіпсіздік және ынтымақтастық ұйымының (ЕҚЫҰ) Демократиялық институттар және адам құқықтары бюросының байқаушыларының пікірінше, өткен сайлауда көптеген заң бұзушылықтар орын алған. Ұйым сайлауға бірнеше партия қатысқанымен, әділ бәсеке болған жоқ деп есептейді.
Сайлауға 20 саяси партияның үміткерлері қатысты. Сонымен бірге бірқатар партиялар сайлауға бойкот жариялаған. Оппозиция өкілдері дауыс беру кезінде бюллетеньдер топ-тобымен тасталып, «карусель» әдісі қолданылғанын айтады. Мерзімінен бұрын парламент сайлауын өткізуді 2019 жылдың желтоқсан айында «Жаңа Әзербайжан» партиясы ұсынған. Оны ел президенті Илхам Алиев қолдаған.