Азат Перуашев «Ақ жол» партиясының төрағасы қызметінен кететінін мәлімдеді

Астана, NEGE. Жиында партия көшбасшысы Азат Перуашев төрағалықтан бас тартатынын мәлімдеді.

«Жаңа көзқарастарға, жаңа бастамаларға жол беру мақсатымен мен партия төрағалығы лауазымынан бас тарту туралы шешім қабылдадым», – деді ол.

Перуашев өз орнына Мәжіліс депутаты Дания Еспаеваның кандидатурасын ұсынды.

«Құрметті әріптестер, "Ақ жол" партиясы төрағалығына әріптесіміз, партиямыздың жарқын жұлдызы, қаржыгер, банкир, Парламент Мәжілісінің вице-спикері Дания Еспаеваның кандидатурасын ұсынамын. Дания Еспаева Қазақстанның саяси тарихында өз есімін әлдеқашан жазып үлгерді. Ол – еліміз тарихындағы президенттікке кандидат ретінде қатысқан алғашқы әйел. 2019 жылғы сайлау кезінде оның есімі Еуропарламентте посткеңестік кеңістіктегі либералдық өзгерістердің үлгісі ретінде аталды», – деді Перуашев.

Сондай-ақ ол Дания Еспаеваның Мәжіліс қабырғасында атқарған бірқатар жұмысына тоқталып, Қазақстан тарихындағы парламенттік оппозиция қатарынан сайланған алғашқы вице-спикер екенін атап өтті.

«Егер Дания Еспаеваны қолдайтын болсақ, ол парламенттік партияны басқаратын алғашқы әйел көшбасшы атанады», – деді ол.

Айта кетейік, Азат Перуашев «Ақжол» Қазақстан демократиялық партиясын 2011 жылғы шілдеден бері басқарып келді. 2012 жылғы қаңтардан Парламенті мәжілісінің депутаты.

Ал Дания Еспаева – 2016 жылғы 24 наурыздан бастап «Ақ жол» демократиялық партиясынан сайланған Мәжіліс депутаты, 2023 жылдан бері төрағаның орынбасары.