AYU FEST: Түркістанда 1-курс студенттерін қабылдау кеші өтті

Түркістан, NEGE. Іс-шараның мақсаты – студенттерді университет өмірі және дәстүрлерімен таныстыру, жаңа ортаға бейімдеу.

Айта кетейік, 2024-2025 жаңа оқу жылында 1892 бірінші курс студенті оқу орнының шәкірттері қатарына қосылды.
Салтанатты жиын студенттік парламент және факультеттердің арнайы шеруімен бастау алды. Әр факультеттің жетістіктері мен бағыттары таныстырылды.

Мерекелік кеш шымылдырығы ректор Жанар Темірбекованың құттықтау тілегімен түрілді.

«Бүгін сіздер үшін өте маңызды күн деп ойлаймын. Себебі, мектепті аяқтағаннан кейін армандарыңызды орындау үшін мамандық таңдап, біздің университетіміздің студенті атандыңыздар.

Бүгінгідей кештердің мағынасы зор деп білеміз. Өйткені, сіздердің жаңа орта мен мәдениетке, академиялық өмірге алғашқы қадамдарыңыз осындай үлкен іс-шаралардан басталады.

Оқу ордамызда сіздермен бірге жақсы күндер өткіземіз деп сенеміз! Ясауи отбасына қош келдіңіздер!»,-деді
Жанар Темірбекова.

Сонымен қатар, оқу ордамыздың құндылықтарын атады. Студенттер сол құндылықтарды бойына сіңіріп, адалдықты ту ететініне сенетінін айтты. Кеш ұйымдастырушылары мен белсенді студенттерге де ризашылығын жеткізді.

Келесі кезекте, Қаржы және халықаралық байланыстар вице-ректоры Мустафа Гиритлиоглу: «Университетіміз – түрік дүниесінің бауырластығы мен мәдениетін жандандырған, әрі оны келешек ұрпаққа жеткізуді мақсат еткен мекен. Сіздер түркі дүниесінің түкпір-түкпірінен жиналған жастармен танысып, мәдениеті мен өркениетін танып, досқа айналасыздар деп сенеміз. Біз, оқытушыларыңыз ретінде сіздерді осы жолда біліммен сусындатып, қолдау көрсететін боламыз! Сіздерге Ясауи университетін таңдағандарыңыз үшін алғыс білдіреміз! Сәттілік пен бақытқа, жылы естелікке толы студенттік өмір тілеймін!»,-деді.

Университет басшылығы құттықтау тілектен соң, студенттерге «Білім кілті» мен «Студенттік билет» табыстады. Оқу ордамыздың атын асқақтатып жүрген әлем чемпиондарын салтанатты түрде марапаттап, университет атынан қаржылай сыйлық табыстады.

Іс-шара 1-курс атанған студенттерінің ант қабылдау рәсімімен жалғасты. Студенттер оқуда озат болып, болашақта білікті маман болуға, еліміз бен университет абыройын асқақтатуға ант берді.

Концерттік бағдарламаға ұласқан жиында өнерлі білімгерлер ән шырқап, би биледі.

Кеш соңында, жұлдызды қонақ – Raim әннен шашу шашты. Студенттерге мерекелік көңіл-күй сыйлап, қошеметке бөленді.

Осылайша, студенттік өмірге қадам басқан білімгерлерге арналған кеш жоғары деңгейде өтті. 1-курс студенттері керемет естеліктерге толы кеш сыйлаған университет басшылығы мен ұйымдастырушыларға алғыс айтты.