Айдос Үкібай Нұрсұлтан Назарбаев пен Владимир Путиннің кездесуіне қатысты пікір білдірді

Алматы, NEGE. Айдос Үкібайдың айтуынша, Қазақстанның бұрынғы президенті Нұрсұлтан Назарбаев пен Ресей президенті Владимир Путинді достық қарым-қатынас байланыстырады. 

• Тақырыпқа орай: Сұрағы мен сұрауы көп кездесу: Назарбаев Путинге НЕГЕ барды?

«Нұрсұлтан Назарбаевтың Мәскеуге сапары жеке, бейресми сипатта болды. Оны Владимир Путинмен көпжылдық достық қарым-қатынас байланыстырады, бұл байланыс мемлекеттік өкілеттіктердің бар-жоғына қарамастан сақталып келеді. Тұңғыш Президент бірқатар әлемдік көшбасшылармен байланыста – бұл телефон арқылы сөйлесу, жеке хат алмасу және жекелеген кездесулер арқылы жүзеге асады. Бұл тек Ресейге ғана емес, сондай-ақ Түркия, Қытай, БАӘ, Өзбекстан, Беларусь және басқа да мемлекеттерге қатысты. Мұндай өзара іс-қимыл форматы халықаралық тәжірибеге сәйкес келеді және мемлекеттік қызмет жылдарында қалыптасқан жеке байланыстарды көрсетеді», – деді Айдос Үкібай.

• Тақырыпқа орай: «Зейнеттегі адамның іші пысатын шығар» – Назарбаев пен Путиннің кездесуі жайлы саясаттанушылар не дейді?

Сонымен қатар, экс-президенттің баспасөз хатшысы Нұрсұлтан Назарбаевпен кездескен күні Ресей Президенті Жапонияның марқұм Премьер-министрі Синдзо Абэнің жесірі Акиэ Абэмен де жеке кездесу өткізгенін атап өтті. 

«Мәселен, Нұрсұлтан Назарбаевпен кездескен күні Ресей Президенті Жапонияның марқұм Премьер-министрі Синдзо Абэнің жесірі Акиэ Абэмен де жеке кездесу өткізді. Ал Нұрсұлтан Назарбаевтың сапарына келсек, ол Жеңістің 80 жылдығына арналған іс-шараларға шақырту алды. Алайда объективті себептерге байланысты ресми мерекелер күндері қатыса алмады және Мәскеуге кейінірек, жеке сапармен барды. Сондай-ақ ерекше атап өткім келеді, Нұрсұлтан Назарбаев Қазақстанда  тұрады. Оның елден кеткені туралы хабарлар шындыққа сәйкес келмейді», – деп қосты Үкібай.

Естеріңізде боолса, өткен аптада Мәскеуде жүрген Қазақстанның бұрынғы президенті Нұрсұлтан Назарбаев Владимир Путинмен Кремльде кездескен болатын.