Айбек Оралбай – 3 дүркін Азия чемпионы
Ұланбатырда өткен ересектер арасындағы Азия чемпионатында қазақстандық боксшы Айбек Оралбай үш дүркін Азия чемпионы атанды.
Астана, NEGE. Қазақстан бокс федерациясының хабарлауынша, әлем чемпионы, +90 келідегі Айбек Оралбай шешуші сында Қытай спортшысы Данабек Байкенжемен жұдырықтасқан.
«Отандасымыз жекпе-жекте қарсыласына ауыр соққыларын дарытып, әр раундты өз еншісіне жазды. Қорытынды есеп: 5:0», – делінген федерация хабарламасында.
Айбек бұған дейін 2022 және 2024 жылдары Азия чемпионы атанған еді.
«Дәл қазір қатарынан үш дүркін Азия чемпионы болдым. Бұл жеңісімді барша қазақ еліне арнаймын. Мақсатым – бес-алты дүркін Азия чемпионы, екі-үш дүркін Әлем чемпионы, Олимпиада чемпионы атану. Сол үшін еңбек етемін», – дейді Айбек Оралбай.
Үш дүркін Азия чемпионы деген атақ бұған дейін тек Василий Левитте ғана болған.
Айта кетейік, бұған дейін Ұланбатырдағы Азия чемпионатында Нұрбек Оралбай, Сабыржан Аққалықов және Оразбек Асылқұлов Қазақсан қоржынына алтын медаль салған еді.
