Аяжан Еділованың өліміне қатысты тергеу аяқталды
Жәбірленуші тараптың қорғаушысы Қадыржан Ғалымжанұлының айтуынша, Алматының арнайы прокуратурасы процеске қатысушыларға тергеу аяқталғанын хабарлаған.
Алматы, NEGE. Жәбірленуші тараптың қорғаушысы Қадыржан Ғалымжанұлының айтуынша, Алматының арнайы прокуратурасы процеске қатысушыларға тергеу аяқталғанын хабарлаған.
«Қазір барлық тарап іс материалдарымен танысып жатыр. Шамамен 30 сараптама жүргізілді, бәрінің жауабы, қорытындысы келді. Іс материалдары бойынша шамамен 20 том, плюс-минус 100 сағаттық видео жасалған, соның бәрімен танысып жатырмыз. Іс қазанда сотқа түседі, 2022 жылдың қаңтарына дейін соттың бірінші инстанциясы үкім шығаруы мүмкін», – деді ол.
Қорғаушының айтуынша, күдіктінің әрекеті екі бап бойынша қаралып жатыр, сол баптар бойынша Төребеков 32 жылға сотталады.
«Біріншісі – 99-баптың 2-бөлігі 10- тармағы, яғни «Өзге қылмысты жасыру үшін адам өлтіру», екіншісі – 120-баптың 2-бөлігі 2-тармағы, яғни «Зорлау». Есептегенде, ең көп дегенде, 32 жылға соттайды. Қанша нұсқа болса, прокуратура сонша нұсқамен жұмыс істеді. Қазіргі уақытта жалғыз нұсқа бекітілді, оны ашып айта алмаймын», – деді қорғаушы.
Қадыржан Ғалымжанұлы сот жабық режимде өтуі мүмкін екенін айтты.